Siku pelajar indu UNIMAS Kuching udah nadai, napi penyakit COVID-19 -->
Cari Berita

Advertisement

Siku pelajar indu UNIMAS Kuching udah nadai, napi penyakit COVID-19

Admin | beritaiban@gmail.com
April 9, 2020

ILLUSTRASYEN PICHA: Tubuh orang ti udah nadai diengkah dalam kain burak.

KUCHING: Siku agi orang ke udah nadai ketegal napi penyakit COVID-19 di Sarawak, sehari tu tadi.

Naka ke diatu, penyampau tubuh orang ke udah nadai ketegal napi penyakit COVID-19 majak nambah nyadi 13 iku.

Pengari Opis Komiti Mutarka Penusah Ngenyit Nengeri Sarawak (JPBNS) lebuh ke meri penerang ba aum pemberita sehari tu tadi, madah orang ke lumur 13 ti udah nadai ketegal napi penyakit COVID-19 iya nya siku indu, 23 taun, agi nyambung sekula ba Universiti Malaysia Sarawak (UNIMAS) enggau diau di Kota Samarahan.

"Apai enggau indai iya (niang) mega diripotka positif COVID-19.

"Ujung bulan nyin tadi, 30 Mac 2020 niang diripotka bisi penanggul tusah deka enseput enggau lalu dipasukka ba wad ICU Sepital Besai Kuching (HUS). Taja pia, niang diripotka udah enda ulih diselamatka agi tauka udah nadai sehari tu tadi (9 April 2020), urung jam 9.42 pagi," ku iya.

Ripot ke baru pasal penyakit COVID-19

Pengari Opis JPBNS mega madah bisi nerima enam iti kes positif COVID-19 ke baru diterima sehari tu tadi enggau ngujungka penyampau kes di Sarawak niki nyadi 312 kes, enti dikira nyengkaum kes positif keterubah diripotka kena 13 Mac 2020.

"Ari enam kes tu, lima agi benung diperubatka di HUS enggau siku agi di Sepital Bintulu," ku iya.