Siku pelajar sekula lesi bebadi, eksiden ba Bukit 19, Jalai Ngungun -->
Cari Berita

Advertisement

Siku pelajar sekula lesi bebadi, eksiden ba Bukit 19, Jalai Ngungun

Admin | beritaiban@gmail.com
April 6, 2020

KASIH AMAT: Pendiau ba palan eksiden nyadi, lemai kemari.

KANOWIT: Siku pelajar sekula lesi bebadi tang pangan iya diripotka balat bakal pengudah motosikal ke ditepan seduai iya belantak enggau sebuah Hilux ba Bukit 19, di Jalai Ngungun/Nanga Ngemah, ditu, lemai kemari.

Nitihka penerang ke diterima beritaiban.com, siku pelajar sekula indu ke dikelala ngena nama Olivia Serani, 13 taun, diripotka ngapuska seput kepenudi ba palan penusah nyadi tang pangan iya ke nepan ba belakang motosikal ke sama, Sharika Eryka Durin, 16 taun, patah kaki.

Chief Opis Tasat enggau Penguasa Trafik Superitendan, Alexson Naga Chabu madah asil pansik tumu raban polis, sebedau eksiden nyadi Olivia enggau pangan iya Sharika ngena motorsikal ari Nang Ngungun nuju ke Nanga Ngemah.

"Lebuh datai ba palan eksiden nyadi, motorsikal ke ditepan seduai iya lalu  belantak enggau sebuah kereta Hilux ke dutepan siku lelaki, 51 taun, benung bejalai mansang ari muak ke Kapit nuju ke Kanowit," ku iya lebuh ke dirandau pengarang berita.

"Olivia (deriba motosikal) enggau pangan iya Sharika (nepan ba belakang) tepelanting ba atas jalai alun tang motorsikal ke ditepan seduai iya tepawah ke sepiak kiba jalai nuju ke Kanowit.

"Sharika ke diripotka enda ngeleda udah dibai ke Klinik Nanga Ngungun ngambika ulih diperubat enggau silik agi," ku Alexson.

Empa pemalat eksiden nya, Sapit Pemesai ari Sepital Sibu ke bisi datai ngesah ke palan eksiden nyadi madahka Olivia udah lesi bebadi tauka enda ulih diselamatka agi.

Lebuh eksiden nyadi, gaya hari benung manah, jalai betiku enggau bebukit.

Kes dipansik ari baruh 'Seksyen 41 (1) Akta Pengangkutan Jalan (APJ) 1987'.



Kami ari raban beritaiban.com, meri penyinu ati ngagai semua bala ke sebilik enggau niang Olivia, kelebih agi ngagai apai enggau indai iya ke udah ditinggalka iya.

Ngarapka semua sida iya sebilik ulih besabar napi penguji tu. RIP Olivia 🙏