Udah temu orang bangkai iya.. -->
Cari Berita

Advertisement

Udah temu orang bangkai iya..

Admin | beritaiban@gmail.com
April 24, 2020

KASIH AMAT: Raban SAR benung ngatung bangkai lelaki ti diripotka lenyau kena Hari Tiga tu tadi.

SRI AMAN: Bangkai tauka tubuh siku lelaki ti dipechayaka tagup baya kena 22 April, udah temu ba semak Sungai Beradik, pagi tadi.

Nitihka penerang ke diterima Berita Iban Online, lelaki ti parai kena tagup baya nya dikelala ngena nama Yanha Mahrat, beumur 29 taun.

Pengari Operasyen Opis Bomba enggau Penyelamat Malaysia (JBPM) Sarawak, madah lelaki nya ditemu raban SAR urung penyauh radius 2.68 kilometer ari jelatung Kampung Melayu Tanjung Bijat, urung jam 7.30 pagi.

"Bangkai Yanha ditemu genturung pendiau ti enggau bejalaika operasyen Ngiga enggau Nyelamat (SAR) ba ulu sungai.

Lebuh ditemu, tubuh Yahna pumpung dua piak jari enggau kaki kiba taka patung. Nyadi tu ngamatka Yahna udah parai ketegal tagup baya," ku iya lebuh dirandau pengarang berita sehari tu tadi.

Pengudah nya, bangkai Yanha dibai ngagai jelatung enggau disuaka ngagai polis sebedau bangkai iya dianjung ke Sepital Sri Aman.

Ku iya, niang Yanha udah bisi ruang bilik kediri enggau bisi dua iku anak.

Sebedau penusah ti enda disadang nyadi, niang (Yanha) nurun mukat enggau tiga bakih iya di Kampung Melayu Tanjung Bijat, Hari Tiga minggu tu tadi.