10 May 2020 - Hari Minggu Ke-Lima Musim Paska -->
Cari Berita

Advertisement

10 May 2020 - Hari Minggu Ke-Lima Musim Paska

Admin | beritaiban@gmail.com
May 10, 2020

“Aku tu meh jalai, pemendar, enggau pengidup. Nadai orang ulih datai ngagai Apai enti enda nengah Aku.” John 14:6

Selamat pagi ‘Hari Minggu Ke-Lima Musim Paska’ ngagai semua bala pemacha @beritaibanMY | beritaiban.com 😇

Ngarapka kitai mujur ngereja semua pengawa nitihka pelin ti udah digaga kitai. Tuhan merekat semua 🙏

Injil sehari tu, ulih dibacha nuan ba baruh tu 👇



Bacha Ke Satu: Surat Pasal Kereja Rasul 6: 1-7

Lebuh maya nya menya, lebuh bala murid nyau majak nambah-menambah, orang Judah ke bejaku ngena jaku Gerika mutap ngelaban orang Hebrew, laban indu balu sida enda dikibuhka orang lebuh orang nyadung pemakai tiap hari.

Sida rasul ke dua belas lalu ngempuruka semua orang ke arap, lalu bejaku ngagai sida, “Kami enda patut ngelengkaka pengawa nusui jaku Allah Taala, lalu meri orang makai.

Nya alai, menyadi, pilih ari bala kita empu tujuh iku orang ke manah perangai, ke penuh laban Roh Kudus sereta bepenemu-dalam, ke tau diasuh kitai ngereja pengawa tu, lalu kami empu deka ngemeranka pengawa besampi enggau nusui Berita Manah.”

Utai ti disebut sida ngelantangka ati semua sida, lalu sida milih Stepen ke penuh laban pengarap enggau Roh Kudus, sama enggau Philip, Prokorus, Nikanor, Timon, Parmenas enggau Nikolaus, siku orang bansa bukai ke datai ari Antiok ke udah masuk pengarap orang Judah.

Sida lalu ngasuh orang nya bediri di mua sida rasul, ke besampi lalu ngengkahka jari atas sida.

Jaku Allah Taala majak ngelekai. Pemayuh murid lalu balat amat majak nambah-penambah di Jerusalem, lalu mayuh amat mega sida imam nerima pengarap nya.

Masmur Entara: Masmur 33: 1-2, 4-5, 18-19

Saut (22): Awakka pengasih Nuan meruan enggau kami, O TUHAN, lebuh kami manggaika pengandal ati kami ba Nuan.

Ke Satu
Rami gaga ati meh kita ke lurus.
Puji meh Iya, semua kita ke ngasika Iya.
Beri terima kasih ngagai TUHAN ngena belikan.
Belagu ke Iya ngena sape.

Saut: Awakka pengasih Nuan meruan enggau kami, O TUHAN, lebuh kami manggaika pengandal ati kami ba Nuan.

Ke Dua
Laban jaku TUHAN endang amat,
lalu semua pengawa Iya endang dikereja Iya enggau ati ti tetap.
TUHAN rinduka atur ti lurus sereta betul.
Dunya penuh laban pengerindu Iya ti meruan belama iya.

Saut: Awakka pengasih Nuan meruan enggau kami, O TUHAN, lebuh kami manggaika pengandal ati kami ba Nuan.

Ke Tiga
TUHAN ngemataka semua orang ke ngasika Iya,
ke manggaika diri ba pengerindu Iya ti meruan belama iya.
Iya ngelepaska sida ari pemati.
Iya ngidupka sida lebuh maya lapar pungkang.

Saut: Awakka pengasih Nuan meruan enggau kami, O TUHAN, lebuh kami manggaika pengandal ati kami ba Nuan.

Bacha Ke Dua: 1 Peter 2: 4-9

Datai meh kita ngagai Iya, laban Iya batu ti idup, ti ditulak mensia, tang dipilih Allah Taala nyadika batu ti berega.

Lalu baka batu ti idup, awakka kita ngelakka diri digaga nyadi rumah Roh Kudus, nyadi bala imam ti kudus ke ngenjuk piring ti dikerinduka Allah Taala, ulih Jesus Kristus.

Laban Bup Kudus nyebut, “Aku ngengkahka sigi batu di Sion, batu pemun, batu ti dipilih sereta berega, lalu barang sapa arapka Iya, sigi enda malu.”

Nya alai, ba kita ke arap, batu nya endang amat berega.

Tang ba orang ke enda arap, “Batu ti ditulak tukang rumah, udah nyadi batu ti pemadu beguna.”

Siti agi ayat dalam Bup Kudus nyebut, “Batu ti ngasuh sida tesangkut, batu ti ngasuh sida rebah.”

Sida tesangkut laban sida enda ngasika jaku Allah Taala.

Tu endang udah diletak Allah Taala ke sida.

Tang kita tu bansa ti dipilih, bala imam diraja, bansa ti kudus, nembiak Allah Taala, ngambika kita madahka pasal pemanah pengawa Allah Taala ke udah ngangauka kita pansut ari pemetang ngagai penampak Iya ti badas.

Alleluia (peda John 14:6)

Alleluia, alleluia
Aku tu meh jalai, pemendar, enggau pengidup, ku TUHAN;
Nadai orang ulih datai ngagai Apai enti enda nengah Aku.
Alleluia.

Bacha Injil: John 14:1-12

Ku Jesus bejaku ngagai bala murid Iya;
“Anang tusah ati. Arapka Allah Taala, lalu arap mega ke Aku.

Dalam rumah Apai Aku mayuh bilik. Enti iya enda baka nya, Aku enda madah ngagai kita Aku deka kin lalu nyendiaka endur ke kita.

Lalu enti Aku mupuk lalu nyendiaka endur ke kita, Aku deka pulai kitu baru, lalu mai kita ngagai Aku Empu, ngambika dia endur alai Aku, dia mega endur alai kita.

Kita nemu jalai ngagai endur ti deka digagai Aku.”

Thomas lalu bejaku ngagai Iya, “Tuhan, kami enda nemu kini ke Nuan deka mupuk. Baka ni ku kami nemu jalai kin?”

Jesus lalu bejaku ngagai iya, “Aku tu meh jalai, pemendar, enggau pengidup.

Nadai orang ulih datai ngagai Apai enti enda nengah Aku.

Enti kita ngelala Aku, kita deka mega ngelala Apai Aku.

Berengkah ari diatu kita ngelala Iya, lalu udah meda Iya.”

Philip lalu bejaku ngagai Iya, “Tuhan, pandangka Apai ngagai kami, ngambika kami puas ati.”

Jesus lalu bejaku ngagai iya, “Aku lama udah begulai enggau kita, Philip, lalu nuan mengkang enda ngelala Aku?

Barang sapa udah meda Aku, udah meda Apai.

Nya alai nama kebuah nuan nyebut, ‘Pandangka Apai ngagai kami’?

Kati nuan enda arapka Aku dalam Apai, lalu Apai dalam Aku?

Jaku ti disebut Aku ngagai kita ukai disebut Aku ari peneka Aku Empu, tang Apai ke dalam Aku ti ngereja pengawa Iya.

Arapka Aku lebuh Aku madahka Diri dalam Apai, lalu Apai dalam Aku.

Tang enti kita enda arapka nya, kita patut arapka Aku ketegal utai ti udah dikereja Aku.

Enggau bendar Aku madah ngagai kita, orang ke arapka Aku, deka mega ngereja pengawa ti dikereja Aku.

Indah pengawa ti besai agi ari nya deh deka dikereja sida, laban Aku mupuk ngagai Apai.



BESAMPI KITAI: Puji ka Nuan Tuhan Jesus Kristus. Amen 🙏