11 May 2020 - Hari Satu ba Minggu Ke-Lima Musim Paska -->
Cari Berita

Advertisement

11 May 2020 - Hari Satu ba Minggu Ke-Lima Musim Paska

Admin | beritaiban@gmail.com
May 11, 2020

“Tang Penyaup, iya nya Roh Kudus, ke deka dikirumka Apai dalam nama Aku, deka ngajar kita semua utai, lalu ngasuh kita ingatka semua utai ti udah disebut Aku ngagai kita.” John 14:26

Selamat pagi ‘Hari Satu ba Minggu Ke-Lima Musim Paska’ ngagai semua bala pemacha @beritaibanMY | beritaiban.com 😇

Ngarapka kitai mujur bejalaika semua pengawa nitihka pelin ti udah diperambu. Tuhan merekat semua 🙏

Injil sehari tu, ulih dibacha nuan ba baruh tu 👇



Bacha Ke Satu: Surat Pasal Kereja Rasul 14: 5-18

Lalu lebuh orang bansa bukai, enggau orang Judah, enggau bala tuai sida deka nguji ngemediska seduai iya, lalu deka nuku seduai iya ngena batu, seduai iya nemu pasal nya lalu rari ngagai Listra enggau Derbe di menua Likonia, enggau ngagai menua ti ngelingi nya, lalu majakka pengawa nusui Berita Manah dia.

Nyadi di Listra bisi siku lelaki ke enda ulih bejalai, ke udah lemi kenyau ari ada, lalu nadai kala bejalai.

Iya mendingka Paul bejaku.

Paul lalu merening ngagai iya, lalu lebuh iya meda orang nya bisi pengarap kena ngeraika,

Paul lalu bejaku enggau nyawa ti inggar, “Bediri nuan!”

Orang nya lalu engkejuk angkat, lalu belabuh bejalai.

Lebuh orang mayuh meda utai ti udah dikereja Paul, sida lalu manjung ngena jaku orang Bansa Likonia, “Bala petara udah nurun ngagai kitai baka gamal mensia!”

Sida lalu ngumbai Barnabas Seus, lalu Paul dikumbai sida Hermis, laban iya orang ke bejaku ngarika seduai iya.

Imam petara Seus, (rumah sembiang Seus enda jauh ari luar nengeri), lalu mai jelu sapi ti lelaki enggau sengkilung bunga ngagai pintu nengeri, laban iya: “enggau orang mayuh deka ngenjuk piring ngagai rasul dua iku nya.”

Tang lebuh rasul Barnabas seduai Paul ninga nya, seduai iya lalu nyarikka gari diri, lalu belanda ngagai tekang bala mayuh,

lalu bejaku enggau nyawa ti inggar, “Nama kebuah kita ngereja utai tu?

Kami duai tu mensia baka kita, lalu kami mai Berita Manah ngagai kita, ngambika kita ngelengkaka utai ti nadai guna tu lalu nguingka diri ngagai Allah Taala ti idup, ke udah ngaga langit, tanah, tasik, enggau semua utai ti dalam sida.

Dulu menya Iya nejuka semua bansa idup nitihka peneka ati sida empu, tang taja pia, Iya enda nejuka Diri nadai saksi ke utai ti manah ti dikereja Iya -- Iya meri kita ujan, ngasuh utai ti ditanam kita bebuah lebat nitihka musin, lalu ngemuaska kita ngena pemakai lalu ngemenuhka ati kita enggau pengaga.”

Tang taja pen seduai iya bejaku munyi nya, seduai iya nyauka enda ulih nagang orang mayuh meri seduai iya piring.

Masmur Entara: Masmur 115: 1-2, 3 - 4, 15-16

Saut (1ab): Ukai kami, O TUHAN, tang Nuan siku aja ke patut dipuji.

Ke Satu
Ukai kami, O TUHAN, ukai kami,
tang Nuan siku aja ke patut dipuji,
laban pengerindu enggau penetap ati Nuan endang meruan belama iya!
Nama kebuah semua bansa nanya,
“Dini alai Allah Taala sida?”

Saut: Ukai kami, O TUHAN, tang Nuan siku aja ke patut dipuji.

Ke Dua
Allah Taala kami di serega.
Iya ngereja sebarang utai ti dikedekaka Iya.
Engkeramba sida digaga ari pirak enggau emas,
ditempa jari mensia.

Saut: Ukai kami, O TUHAN, tang Nuan siku aja ke patut dipuji.

Ke Tiga
Awakka kita diberekatka TUHAN
ti udah ngaga langit enggau dunya!
Serega endang enggi TUHAN siku aja,
tang Iya meri dunya ngagai kitai mensia.

Saut: Ukai kami, O TUHAN, tang Nuan siku aja ke patut dipuji.

Alleluia (peda John 14:26)

Alleluia, alleluia
Roh Kudus deka ngajar kita semua utai,
lalu ngasuh kita ingatka semua utai ti udah disebut Aku ngagai kita.
Alleluia.

Bacha Injil: John 14: 21-26

Ku Jesus bejaku ngagai bala murid Iya:
“Orang ke nerima lalu ngasika pesan Aku, nya meh orang ke rinduka Aku.

Lalu orang ke rinduka Aku deka dikerinduka Apai Aku, lalu Aku deka rinduka sida, lalu mandangka Diri ngagai sida.”

Judas, (ukai Judas Iskariot) lalu bejaku ngagai Iya, “Tuhan, nama kebuah Nuan deka mandangka Diri ngagai kami, lalu enda ngagai dunya?”

Ku Jesus nyaut iya, “Orang ke rinduka Aku deka ngasika pesan Aku, lalu Apai Aku deka rinduka iya, lalu kami duai Apai deka datai ngagai iya, lalu diau enggau iya.

Barang sapa enda rinduka Aku, enggai ngasika jaku  Aku.

Lalu jaku ti didinga kita nya ukai jaku Aku, tang jaku Apai ke ngirumka Aku.

“Aku udah nyebut utai tu lebuh Aku agi enggau kita.

Tang Penyaup, iya nya Roh Kudus, ke deka dikirumka Apai dalam nama Aku, deka ngajar kita semua utai, lalu ngasuh kita ingatka semua utai ti udah disebut Aku ngagai kita.”



BESAMPI KITAI: Puji ka Nuan Tuhan Jesus Kristus. Amen 🙏