12 May 2020 - Hari Dua ba Minggu Ke-Lima Musim Paska -->
Cari Berita

Advertisement

12 May 2020 - Hari Dua ba Minggu Ke-Lima Musim Paska

Admin | beritaiban@gmail.com
May 12, 2020

“Aku ninggalka pemaik ba kita. Pemaik Aku diberi Aku ngagai kita. Aku ukai meri ngena chara dunya. Anang tusah ati, lalu anang takut.”

Selamat pagi, ‘Hari Dua ba Minggu Ke-Lima Musim Paska’ ngagai semua bala pemacha @beritaibanMY | beritaiban.com 😇

Ngarapka kitai mujur bejalaika semua pengawa nitihka pelin ti udah diperambu. Tuhan merekat semua 🙏

Injil sehari tu, ulih dibacha nuan ba baruh tu 👇



Bacha Ke Satu: Surat Pasal Kereja Rasul 14: 19 - 28

Tang sekeda orang Judah datai ari Antiok enggau ari Ikonium, lalu nguingka ati orang mayuh. Sida lalu nuku Paul ngena batu, lalu ngirit iya pansut ari nengeri nya, laban sida ngumbai iya udah mati.

Tang lebuh sida murid begelumu ngelingi iya, iya angkat lalu pulai baru ngagai nengeri. Hari siti, iya mupuk enggau Barnabas ngagai Derbe.

Lebuh seduai iya udah nusui Berita Manah ngagai orang di nengeri nya, lalu mayuh orang nyadi murid, seduai iya lalu pulai baru ngagai Listra, Ikonium, enggau ngagai Antiok.

Dia seduai iya ngeringka semengat sida murid, lalu meransang sida seruran tetap dalam pengarap.

Ku seduai iya, “Kitai endang enda tau enda ngasaika mayuh macham penusah enti kitai deka tama ngagai Perintah Allah Taala.”

Lebuh seduai iya udah nuduhka orang nyadi tuai ba genap buah eklisia, seduai iya lalu nyerahka sida ngena sampi sereta bepasa ngagai Tuhan ke dikarapka sida.

Udah nya seduai iya bejalai nengah menua Pisidia, lalu datai di Pampilia.

Lebuh seduai iya udah madahka jaku Tuhan di Perga, seduai iya lalu nurun ngagai Atalia.

Ari nya seduai iya belayar ngagai Antiok, alai seduai iya ke udah diserahka ngagai ibun Allah Taala ketegal pengawa ti udah tembu dikereja seduai iya.

Lebuh seduai iya datai di Antiok, seduai iya lalu ngempuruka raban eklisia, lalu madahka semua utai ti udah dikereja Allah Taala ngena seduai iya, enggau pasal Allah Taala ke udah muka pintu pengarap ngagai orang bansa bukai.

Lalu seduai iya diau lama dia enggau bala murid.

Masmur Entara: Masmur 145: 10 - 11, 12 - 13AB, 21

Saut (peda 12): Semua pangan Nuan, O TUHAN, madahka pemesai mulia perintah Nuan.

Ke Satu
Semua utai ti idup ti udah digaga Nuan, O TUHAN,
deka meri terima kasih ngagai Nuan,
lalu semua nembiak Nuan deka muji Nuan.
Sida deka bejakuka pasal mulia diraja Nuan
lalu madahka pasal kuasa Nuan.

Saut: Semua pangan Nuan, O TUHAN, madahka pemesai mulia perintah Nuan.

Ke Dua
Ngambika semua orang nemu pemesai pengawa Nuan
enggau pemesai mulia perintah Nuan.
Perintah Nuan endang meruan belama iya,
lalu Nuan nyadi Raja belama iya.

Saut: Semua pangan Nuan, O TUHAN, madahka pemesai mulia perintah Nuan.

Ke Tiga
Aku deka seruran muji TUHAN.
Awakka semua utai ti idup ti udah digaga Iya,
muji nama Iya ti kudus belama lama iya.

Saut: Semua pangan Nuan, O TUHAN, madahka pemesai mulia perintah Nuan.

Alleluia (peda Luke 24: 46, 26)

Alleluia, alleluia
Kristus enda tau enda natka pemerinsa, lalu angkat ari mati,
lalu udah nya dimuliaka.
Alleluia.

Bacha Injil: John 14: 27-31

Ku Jesus bejaku ngagai sida murid Iya:
“Aku ninggalka pemaik ba kita.

Pemaik Aku diberi Aku ngagai kita.

Aku ukai meri ngena chara dunya.

Anang tusah ati, lalu anang takut.

Kita udah ninga Aku nyebut ngagai kita, ‘Aku deka mupuk, lalu Aku deka datai baru ngagai kita.’

Enti kita rinduka Aku, kita deka gaga ati ninga Aku deka mupuk ngagai Apai, laban Apai besai agi ari Aku.

Diatu Aku udah madahka tu ngagai kita sebedau iya nyadi, ngambika lebuh iya nyadi, kita deka arap.

Aku enda bejaku lama agi enggau kita, laban pemerintah dunya tu deka datai.

Iya nadai kuasa atas Aku, tang Aku ngereja utai ti diasuh Apai, ngambika dunya nemu Aku rinduka Apai.”



BESAMPI KITAI: Puji ka Nuan Tuhan Jesus Kristus. Amen 🙏