13 May 2020 - Hari Tiga ba Minggu Ke-Lima Musim Paska -->
Cari Berita

Advertisement

13 May 2020 - Hari Tiga ba Minggu Ke-Lima Musim Paska

Admin | beritaiban@gmail.com
May 13, 2020

“Aku tu pun anggur ti bendar, lalu Apai Aku tukang kebun.” John 15:1

Selamat pagi ‘Hari Tiga ba Minggu Ke-Lima Musim Paska’ ngagai semua bala pemacha @beritaibanMY | beritaiban.com 😇

Ngarapka kitai mujur bejalaika semua pengawa nitihka pelin ti udah ditetapka. Tuhan merekat semua 🙏

Injil sehari tu, ulih dibacha nuan ba baruh tu 👇



Bacha Ke Satu: Surat Pasal Kereja Rasul 15: 1-6

Tang sekeda orang datai ari Judea lalu ngajar bala menyadi, ku sida, “Enti kita enda ditutus nitihka adat asal Moses, kita enda ulih diselamatka.”

Lalu lebuh Paul seduai Barnabas udah bebendar bekelikuh ngelaban sida pasal pekara nya, Paul seduai Barnabas, enggau sekeda orang bukai lalu diasuh mupuk ngagai Jerusalem ngambika sida berandauka pasal pekara tu enggau sida rasul enggau tuai eklisia.

Nya alai raban eklisia lalu ngasuh sida mupuk, lalu lebuh sida bejalai nengah menua Poenisia enggau Samaria, sida madahka pasal orang bansa bukai ke udah nguingka diri ngagai Allah Taala, lalu semua sida ke arap gaga amat ati ninga nya.

Lebuh sida datai di Jerusalem, sida disambut raban eklisia enggau sida rasul enggau sida tuai eklisia. Sida lalu madahka pasal semua utai ti udah dikereja Allah Taala ngena sida.

Tang sekeda orang ke arap, ke ari raban orang Parisi, bediri lalu bejaku, “Orang bansa bukai enda tau enda ditutus, lalu diasuh nitihka Adat Moses.”

Sida rasul enggau sida tuai eklisia lalu bejuraika pekara nya.

Masmur Entara: Masmur 122: 1-2, 3-4AB, 4CD-5

Saut (peda 1): Aram kitai mansang ngagai rumah TUHAN enggau gaga ati.

Ke Satu
Aku gaga ati lebuh sida bejaku enggau aku,
“Aram kitai mansang ngagai rumah TUHAN.”
Lalu diatu kitai bisi ditu,
bediri ba mua pintu nengeri Jerusalem!

Saut: Aram kitai mansang ngagai rumah TUHAN enggau gaga ati.

Ke Dua
Jerusalem udah digaga nyadi nengeri
ti manah gaya sereta betul atur.
Tu meh endur alai raban bansa datai.

Saut: Aram kitai mansang ngagai rumah TUHAN enggau gaga ati.

Ke Tiga
Raban bansa orang Israel,
meri terima kasih ngagai TUHAN.
Tu meh endur alai sida raja orang Israel
duduk ngakim bala nembiak sida.

Saut: Aram kitai mansang ngagai rumah TUHAN enggau gaga ati.

Alleluia (peda John 15: 4A, 5B)

Alleluia, alleluia
Meruan dalam Aku, lalu Aku deka meruan dalam kita, ku TUHAN;
Orang ke meruan dalam Aku, deka bebuah lebat.
Alleluia.

Bacha Injil: John 15: 1-8

Ku Jesus bejaku ngagai sida murid Iya:
“Aku tu pun anggur ti bendar, lalu Apai Aku tukang kebun.

Iya muai ari Aku genap iti dan ti enda bebuah. Genap iti dan ti bebuah, dijarauIya, ngambika dan nya bebuah lebat agi.

Kita udah dituchi  ulih jaku ti disebut Aku ngagai kita.

Meruan dalam Aku, lalu Aku deka meruan dalam kita.

Dan enda ulih bebuah ngatika diri enti iya enda meruan begempung enggau pun.

Baka nya mega kita; kita enda ulih bebuah enti kita enda meruan dalam Aku.

Aku tu pun anggur, kita nya dan.

Orang ke meruan dalam Aku, lalu Aku meruan dalam sida, deka bebuah lebat, laban enti nadai Aku, kita enda ulih ngereja sebarang utai.

Barang sapa enda meruan dalam Aku, deka dibuai baka dan lalu layu.

Dan ti baka nya deka digumpul, ditikauka ngagai api, lalu ditunu.

Enti kita meruan dalam Aku, lalu jaku Aku meruan dalam kita, pinta sebarang utai ti dikedekaka kita, lalu utai nya deka dikereja ke kita.

Apai Aku dimuliaka, enti kita bebuah lebat lalu nyadi murid Aku.”



BESAMPI KITAI: Puji ka Nuan Tuhan Jesus Kristus. Amen 🙏