15 May 2020 - Hari Lima ba Minggu Ke-Lima Musim Paska -->
Cari Berita

Advertisement

15 May 2020 - Hari Lima ba Minggu Ke-Lima Musim Paska

Admin | beritaiban@gmail.com
May 15, 2020

“Aku enda agi ngumbai kita ulun, laban ulun enda nemu utai ti dikereja tuan iya. Tang Aku udah ngumbai kita pangan, laban Aku udah madah ngagai kita semua utai ti didinga Aku ari Apai.” John 15:15

Selamat pagi ‘Hari Lima ba Minggu Ke-Lima Musim Paska’ ngagai semua bala pemacha @beritaibanMY | beritaiban.com 😇

Ngarapka kitai mujur bejalaika semua pengawa nitihka pelin ti udah ditetapka. Tuhan merekat semua 🙏

Injil sehari tu, ulih dibacha nuan ba baruh tu 👇



Bacha Ke Satu: Surat Pasal Kereja Rasul 15: 22-31

Udah nya, sida rasul enggau bala tuai eklisia, disukung semua raban eklisia, lalu berunding deka milih orang ari raban sida lalu ngasuh orang nya bejalai ngagai Antiok nyempulang Paul seduai Barnabas.

Sida lalu milih Judas (ke dikumbai Barsabas) seduai Silas, dua iku tuai orang ke arap, mai surat tu:

“Menyadi, kami ke rasul enggau tuai eklisia, ngirumka tabi basa ngagai semua bala kita ke orang bansa bukai, ke diau di Antiok di menua Siria enggau di Silisia.

Kami bisi udah ninga sekeda orang ari bala kami, tang ukai ari asuh kami, bisi udah nyebut utai ti ngenusahka ati kita
nya alai semua kami udah besetuju deka milih pengari  lalu ngasuh sida nemuai ngagai kita, nyereta Barnabas seduai Paul, menyadi ti dikerinduka kitai, ke udah berambunka nyawa ketegal Jesus Kristus Tuhan kitai.

Nya alai, kami udah ngasuh Judas seduai Silas nemuai ngagai kita, lalu seduai iya deka madah ngagai kita mua mata utai ti ditulis kami dalam surat tu.

Laban dalam runding Roh Kudus enggau dalam runding kami, kami enda patut nating kita enggau utai bukai, kelimpah ari atur tu, iya nya: anang makai pemakai ti udah diberi ngagai engkeramba, anang makai darah, anang makai jelu ti mati dichekal, anang ngereja ulah ti kamah. Enti kita enda ngereja utai nya, nya manah amat. Selamat tinggal.”

Nya alai sida lalu diasuh mupuk lalu mansang ngagai Antiok. Lebuh sida udah ngempuruka semua orang ke arap, sida lalu nyuaka surat nya ngagai sida.

Lebuh raban eklisia macha surat nya, sida gaga amat ati ninga jaku peransang nya.

Masmur Entara: Masmur 57: 7-8, 9 & 11

Saut (peda 9a): Aku deka meri terima kasih ngagai Nuan, O TUHAN, di mua semua bansa.

Ke Satu
Aku nadai irau mimit, O Allah Taala.
Aku deka belagu muji Nuan!
Dani meh nuan, O semengat aku!
Dani meh kita belikan enggau engkeratung aku!
Aku deka ngerak mata hari.

Saut: Aku deka meri terima kasih ngagai Nuan, O TUHAN, di mua semua bansa.

Ke Dua
Aku deka meri terima kasih ngagai Nuan, O TUHAN,
di mua semua bansa bukai.
Aku deka muji Nuan di mua semua bansa.
Ayanka pemesai kuasa Nuan di langit, O Allah Taala,
lalu ayanka mulia Nuan di serata dunya.

Saut: Aku deka meri terima kasih ngagai Nuan, O TUHAN, di mua semua bansa.

Alleluia (peda John 15: 15B)

Alleluia, alleluia
Aku ngumbai kita pangan, ku TUHAN;
laban Aku udah madah ngagai kita semua utai ti didinga Aku ari Apai.
Alleluia.

Bacha Injil: John 15: 12-17

Ku Jesus bejaku ngagai sida murid Iya:
“Tu pesan Aku: rinduka pangan diri, baka Aku ke udah rinduka kita.

Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya.

Kita pangan Aku enti kita ngasika pesan Aku.

Aku enda agi ngumbai kita ulun, laban ulun enda nemu utai ti dikereja tuan iya.

Tang Aku udah ngumbai kita pangan, laban Aku udah madah ngagai kita semua utai ti didinga Aku ari Apai.

Ukai kita ke milih Aku, tang Aku ke milih kita, lalu ngasuh kita bejalai lalu bebuah lebat, buah ti tan.

Nya baru Apai deka meri ngagai kita sebarang utai ti dipinta kita ari Iya dalam nama Aku.

Tu pesan ti diberi Aku ngagai kita: rinduka pangan diri.”



BESAMPI KITAI: Puji ka Nuan Tuhan Jesus Kristus. Amen 🙏