5 iku bakal, dua buah lori belantak di Jalai Saratok-Betong -->
Cari Berita

Advertisement

5 iku bakal, dua buah lori belantak di Jalai Saratok-Betong

Admin | beritaiban@gmail.com
May 23, 2020

KASIH AMAT: Dua lelaki (segala oren) tesepit ba dalam lori pengudah eksiden nyadi.

Lima iku bakal pengudah dua buah lori belantak di Kilometer 13 Jalai Saratok-Betong, sehari tu tadi.

Nitihka penerang ke dibacha kami ba portal Utusan Borneo, dua buah lori nya sama bela sarat ngundan barang.

Sebuah lori sarat ngundan utai empa ti agi matak, tang sebuah agi lori ngundan perengka ke dikena orang gawa kunterik tauka ngaga begunan.

Eksiden dipechayaka nyadi urung jam 9 pagi, lebuh eksiden nyadi dua buah lori ti sarat ngundan barang nya sama bela benung dirantau jalai deka nganjung barang nya ke endur ti udah ditetapka.

Pengudah eksiden nyadi, deriba lori enggau kelindan ti ngundan perengka ke dikena orang gawa kunterik tauka ngaga begunan bisi bakal.

Tang taja pia, deriba lori enggau dua iku kelindan ti ngundan utai empa nya diripotka semina bakal mimit aja.

Ketuai Balai Bomba Saratok, Nazry Mohamat madahka, lebuh eksiden nyadi dua buah lori nya benung bejalai mansang ari mua pangan diri.

“Nitihka penerang tumu ari tudah ke eksiden nya, deriba lori, 46 taun enggau kelindan ti beumur 32 enggau 34 taun ti ngundan utai empa agi matak nya benung dirantau jalai deka nganjung utai empa nya ari Betong nuju ke ke Saratok.

“Tang deriba lori, 58 taun enggau siku kelindan, 31 taun ti ngundan perengka ke dikena orang gawa kunterik tauka ngaga begunan, mansang ari Sibu nuju ke Betong.

“Empa pemalat eksiden nya lalu ngujung ke deriba lori enggau kelindan ti ngundan perengka ke dikena orang gawa kunterik tauka ngaga begunan tesepit ba dalam lori nya," ku iya lebuh dirandau pengarang berita, sehari tu tadi.

Dipercayai deriba lori nya dipechayaka udah patah kaki kiba, tang kelindan ke sama nepan lori nya mega patah kaki kanan enggau bakal ba belakang rekung iya.

Ku Nazry, urung pengelama 45 minit baru raban bomba ulih ngemansutka tudah seduai iya ti tesepit ba lori nya.

“Semua sida iya ke bakal nya udah disuaka ngagai raban ambulans ari Sepital Saratok ngambika ulih diperubatka enggau silik agi,” tandu Nazry.