9 May 2020 - Hari Enam ba Minggu Ke-Empat Musim Paska -->
Cari Berita

Advertisement

9 May 2020 - Hari Enam ba Minggu Ke-Empat Musim Paska

Admin | beritaiban@gmail.com
May 9, 2020

“Aku deka ngereja sebarang utai ti dipinta kita dalam nama Aku, ngambika Apai dimuliaka dalam Anak. Enti kita minta sebarang utai dalam nama Aku, Aku deka ngereja nya.” John 14:13-14

Selamat pagi Hari Enam ba Minggu Ke-Empat Musim Paska ngagai semua bala pemacha @beritaibanMY | beritaiban.com 😇

Ngarapka kitai mujur ngereja semua pengawa nitihka pelin ti udah digaga kitai. Tuhan merekat semua 🙏

Injil sehari tu, ulih dibacha nuan ba baruh tu 👇



Bacha Ke Satu: Surat Pasal Kereja Rasul 13: 44-52

Lebuh hari Sabat ti nangkanka nya, nyauka semua orang ke dalam nengeri nya datai mendingka jaku Tuhan.

Tang lebuh orang Judah meda pemayuh orang, sida kepapas.

Sida lalu ngelese sereta nyakal jaku Paul.

Paul seduai Barnabas bejaku enggau berani.

Ku seduai iya, “Jaku Allah Taala endang enda tau enda disebut dulu ngagai kita.

Tang laban kita nulak jaku nya, lalu kita ngira diri enda patut nerima pengidup ti meruan belama iya, kami diatu deka nguingka diri ngagai orang bansa bukai.

Laban tu pesan ti udah diberi Tuhan ngagai kami, ‘Aku udah ngaga seduai nyadi penampak ke orang bansa bukai, ngambika seduai mai pengelepas nyentuk ngagai ujung dunya.’”

Lebuh orang bansa bukai ninga nya, sida gaga ati, lalu muji jaku Allah Taala, lalu sida ke udah dipilih nerima pengidup ti meruan belama iya, arap.

Jaku Tuhan lalu ngelekai ngagai semua endur di menua nya.

Tang orang Judah ngeruga ati orang indu ke tinggi pangkat ke angkunka Allah Taala, enggau sida lelaki ke tinggi pangkat di nengeri nya, lalu nyungkak sida merinsaka Paul seduai Barnabas, lalu muru seduai iya ari menua sida.

Nya alai Paul seduai Barnabas nesai abus ari kaki seduai iya, kena ngelaban sida, lalu mupuk ngagai Ikonium.

Sida murid lalu gaga amat ati, sereta penuh laban Roh Kudus.

Masmur Entara: Masmur 98: 1, 2-3AB, 3CD-4

Saut (3cd): Semua bansa di semua endur udah meda kuasa pengelepas Allah Taala.

Ke Satu
Nyanyi pantun ti baru ke TUHAN.
Iya udah ngereja utai ti badas!
Ngena kuasa Iya enggau pengering Iya ti kudus,
Iya udah bulih pemenang.

Saut: Semua bansa di semua endur udah meda kuasa pengelepas Allah Taala.

Ke Dua
TUHAN madahka pemenang Iya.
Iya ngasuh semua bansa nemu kuasa Iya ti ngelepas.
Iya ngamatka semaya Iya ngagai orang Israel ngena ati ti tetap enggau pengerindu ti meruan belama iya.

Saut: Semua bansa di semua endur udah meda kuasa pengelepas Allah Taala.

Ke Tiga
Semua bansa di semua endur udah meda pemenang Allah Taala kami.
Belagu gaga ati ke TUHAN, semua kita dunya.
Puji Iya ngena pantun enggau panjung gaga ati!

Saut: Semua bansa di semua endur udah meda kuasa pengelepas Allah Taala.

Alleluia (John 8:31B-32)

Alleluia, alleluia
Enti kita bepegai ba jaku Aku, kita amat murid Aku,
lalu kita deka nemu pemendar, ku TUHAN.
Alleluia.

Bacha Injil: John 14:7-14

Ku Jesus bejaku ngagai bala rasul Iya;
Enti kita ngelala Aku, kita deka mega ngelala Apai Aku.

Berengkah ari diatu kita ngelala Iya, lalu udah meda Iya.”

Philip lalu bejaku ngagai Iya, “Tuhan, pandangka Apai ngagai kami, ngambika kami puas ati.”

Jesus lalu bejaku ngagai iya, “Aku lama udah begulai enggau kita, Philip, lalu nuan mengkang enda ngelala Aku? Barang sapa udah meda Aku, udah meda Apai. Nya alai nama kebuah nuan nyebut, ‘Pandangka Apai ngagai kami?’

Kati nuan enda arapka Aku dalam Apai, lalu Apai dalam Aku? Jaku ti disebut Aku ngagai kita ukai disebut Aku ari peneka Aku Empu, tang Apai ke dalam Aku ti ngereja pengawa Iya.

Arapka Aku lebuh Aku madahka Diri dalam Apai, lalu Apai dalam Aku.

Tang enti kita enda arapka nya, kita patut arapka Aku ketegal utai ti udah dikereja Aku.

Enggau bendar Aku madah ngagai kita, orang ke arapka Aku, deka mega ngereja pengawa ti dikereja Aku.

Indah pengawa ti besai agi ari nya deh deka dikereja sida, laban Aku mupuk ngagai Apai.

Aku deka ngereja sebarang utai ti dipinta kita dalam nama Aku, ngambika Apai dimuliaka dalam Anak.

Enti kita minta sebarang utai dalam nama Aku, Aku deka ngereja nya.”



BESAMPI KITAI: Puji ka Nuan Tuhan Jesus Kristus. Amen 🙏