Dua lelaki parai, eksiden di Jalai Serian By Pass -->
Cari Berita

Advertisement

Dua lelaki parai, eksiden di Jalai Serian By Pass

Admin | beritaiban@gmail.com
May 8, 2020

BALAT AMAT: Luan kerita Hilux pengudah eksiden nyadi.

SERIAN: Dua nembiak lelaki parai pengudah mutosikal ke ditepan seduai iya belantak enggau sebuah kerita Hilux di Jalai Serian By Pass, malam tadi (Hari Empat).

Nitihka penerang ke diterima Berita Iban Online, dua nembiak lelaki nya dikelala ngena nama Neavin Danny, orang ari Kampung Kakai, Serian enggau Nick Noah Niklas, ti nepan ba belakang mutosikal (penunggang), orang ari Kampung Pasir.

Ketuai Opis Tasat enggau Penguasa Trafik (JSPT) Sarawak, Superintenden Alexson Naga Chabu madahka, seduai dua ke eksiden nya sama bela serambau, 18 taun, siku dikelala ngena nama Nick Noah Niklas enggau siku agi, Neavin Danny.

Ku Alexson, eksiden nyadi urung jam 8.10 malam nya, Nick enggau Neavin benung ngena sebuah mutosikal.

“Sebedau eksiden nyadi, kerita Hilux nya benung bejalai ba jalai sepiak kiba nuju ke Balai Ringin.

“Lebuh datai ba palan eksiden nyadi,  deriba kerita Hilux nya madahka, bisi dua buah mutosikal ngelaban arus enggau iya nguji deka nyeliahka dua buah mutosikal nya, tang lalu ngujungka kerita Hilux nya ngelantak tudah Nick enggau Neavin.

“Ketegal eksiden nya mega lalu ngujungka Nick enggau Neavin ngapuska seput kepenudi ba palan eksiden nyadi, ketegal balat bakal ba pala enggau seduai iya,” ku Alexson madah ba ripot, sehari tu tadi.

Pengudah nya, tubuh tudah Nick enggau Neavin dianjung ke Sepital Serian kena bejalaika pengawa silik agi.

Ku iya, pengawa mansik udah dipejalaika ba palan eksiden nyadi enggau jaku tauka ripot ari orang ke meda eksiden nyadi (saksi) udah dirikod kena bejalaika pengawa mansik.

“Kes deka dipansik ari baruh ‘Seksyen 41 Akta Pengangkutan Jalan 1987’,” ku Alexson.

KASIH AMAT: Agi biak amat umur seduai iya. RIP Nick enggau Neavin.. 🙏😢