Enda tau ngabang maya ngintu Hari Gawai Dayak..
Cari Berita

Advertisement

Enda tau ngabang maya ngintu Hari Gawai Dayak..

Admin | beritaiban@gmail.com
May 25, 2020

Sapit Kepala Menteri Sarawak, Datuk Amar Douglas Uggah Embas.

Ngabang Gawai ari rumah ke rumah enggau ari rumah panjai ke rumah panjai maya ngintu Hari Gawai Dayak enda dikemendarka Opis Komiti Mutarka Penusah Ngenyit Sarawak.

Komiti Mutarka Penusah Ngenyit Sarawak (JPBNS) madahka, pemutus jaku nya digaga maya Aum Khas sehari tu tadi.

Ba media ninting hari COVID-19 kena 14 Mei 2020, Sapit Kepala Menteri Sarawak, Datuk Amar Douglas Uggah Embas madahka, Hari Gawai kena 1 Jun tu semina dikemendarka diintu sehari aja sereta tatak tubuh 20 bala diri sebilik enggau orang ke berimbai rumah (neighbour) ti semak aja.

Ku Uggah, pekara tu nyadi Prosedur Operasyen Standard (SOP) ngintu Hari Raya Aidilfitri enggau Gawai Dayak.

“Kelimpah ari nya, entara pengawa tauka aktiviti ti enda dikemendarka maya ngintu pengerami iya nya, meraka entara Pelilih ketegal deka pulai ke menua diri empu (balik kampung).

“Enda dikemendarka ngabang tauka ngusung ke rumah kaban belayan tauka kaban semak, enda ulih ngaga rumah tebuka (open house), enda betabi enggau betegu pangan diri, sembiang ‘tahlil’ enggau ‘kenduri’ Hari Raya.

“Kemari lebuh aku meri jaku gerah pasal pengawa tauka aktiviti ngabang maya Hari Raya enggau Hari Gawai semina sehari, tang bisi sekeda ari bala kitai melabaka sida iya ulih pulai ke menua (balik kampung).

“Aku minta ampun laban mesti ngaga pemutus baka tu enggau aku nemu bakani asai ati kita tang diatu kitai bisi situasyen iya nya ngelaban COVID-19, kitai patut besaup ngambika ulih ngemunaska pengelekai igi penyakit tu,” ku iya.

Kelimpah ari nya, ba aum media kena 19 May 2020, Uggah ti nyadi Chairman Komiti Mutarka Penusah Ngenyit Sarawak (JPBNS) madahka, pejalai entara pelilih agi enda dikemendarka di Sarawak sepemanjai timpuh Atur Mindah Besekat Ke Bisi Penetap (PKPB).

“Jaku gerah pasal enda dikemendarka mindah entara pelilih nya semina dipejalai sereta diteritka itu di Sarawak ketegal pemesai sukat menua tu sama enggau Semenanjung Malaysia enggau bisi sekeda endur zon hijau (COVID-19) dalam pelilih. Nya alai, pengawa ngempang jalai entara pelilih agi patut dipejalaika,” ku iya madah enggau nyemetak.

“Aku udah madahka berapa penyampau kes positif ti nyadi ba luar nengeri laban bisi pejalai tudah tauka orang ti positif COVID-19 ari Kuching ke sesiti endur lalu ngujungka COVID-19 ngelekai.

“Kitai nguji nagang pekara nya nyadi laban nya mih kebuah ti lumur satu ngelekai  COVID-19 di menua tu taja pan entara zon gadung enggau zon gadung,” tandu iya.