Enda tau pulai ke menua, ngabang, betabi, ngabas pendam.. -->
Cari Berita

Advertisement

Enda tau pulai ke menua, ngabang, betabi, ngabas pendam..

Admin | beritaiban@gmail.com
May 14, 2020

ILLUSTRASYEN PICHA: Serumpu enggau kaban belayan di ruai. (Wikiwand picha)

Pengerami Hari Raya Aidilfitri enggau Hari Gawai di negeri Sarawak semina dikemendarka diintu sehari aja, iya nya kena hari keterubah sereta penyampau tubuh enda ulih ngelui ari 20 iku bala diri sebilik enggau orang berembai rumah ke semak.

Sapit Kepala Menteri Sarawak, Datuk Amar Douglas Uggah Embas madahka, deka nerangka enggau silik malin penerang sereta SOP ngintu pengerami Hari Besai iya nya, Hari Gawai enggau Hari Raya ti udah dipadahka kemari.

Ku iya, entara pengawa tauka aktiviti ti ENDA DIKEMENDARKA maya ngintu pengerami iya nya:

A) Pulai ke menua (balik kampung) ti bekait enggau pemindah entara pelilih.

B) Ngabang ke rumah diri sebala tauka kaban belayan.

C) Ngaga ‘open house’.

D) Betabi enggau betegu pangan diri.

E) Ngabas pendam, ‘Tahlil’ enggau ‘kenduri Hari Raya’.

"Kemari, lebuh aku madahka pengawa tauka aktiviti maya Hari Raya Aidilfitri enggau Hari Gawai semina ulih diintu sehari aja tang bisi sekeda ari bala kitai ti berunding ulih pulai ke menua diri.

“Aku minta ampun laban ngaga pemutus baka tu enggau aku nemu bakani asai ati kita. Kitai maya tu bisi situasyen iya nya ngelaban COVID-19, kita patut besaup ngemunaska tauka nagang penyelekai igi penyakit tu," ku iya.

Uggah ti mega Chairman Komiti Mutarka Penusah Ngenyit Nengeri Sarawak (JPBNS) mansutka jaku tauka pekara nya ba Aum Media COVID-19 Sarawak, sehari tu tadi.