Nadai salah enti enda ngena pemampul idung enggau mulut -->
Cari Berita

Advertisement

Nadai salah enti enda ngena pemampul idung enggau mulut

Admin | beritaiban@gmail.com
May 8, 2020

ILLUSTRASYEN PICHA: Orang mayuh benung berintai nitih gintir deka bebayarka barang. (TheSunDaily picha)

PUTRAJAYA: Bala pemesai ba shopping mall tauka kedai enda ulih nagang orang mayuh ti enda ngena Pemampul Idung enggau Mulut (MASK), lebuh sida deka bebelika barang.

Menteri Kanan (Kluster Pengelikun), Datuk Seri Ismail Sabri Yaakob madahka, Pemampul Idung enggau Mulut (mask) nya kena kitai nyaga diri (PPE) ukai pekara ke patut dititih tauka undang-undang ti udah ditukuka perintah.

Tang taja pia, perintah amat ngemendarka semua kitai sama bekena pemampul idung enggau mulut, kelebih agi enti nyema kitai enda entu bepengerai baka batuk tauka renga.

“Nadai salah enti nyema kitai enda ngena pemampul idung enggau mulut, orang ke ngempu kedai enda ulih muru orang ke tama (customer) taja sida nadai ngena pemampul idung enggau mulut.

“Aku ngarapka shopping mall tauka kedai enda ngaga undang-undang kediri empu.

“Enda ulih nagang enggau muru orang (customer) pulai ke rumah dulu. Nya sigi enda ulih laban udah ngelaban Akta Nyeliah enggau Nyaga Pengelekai Penyakit 1988,” ku iya mansutka jaku tauka pekara nya ba aum pengarang berita, sehari tu tadi.

Ku Ismail Sabri, aku ngemeranka semua ti bisi muka kedai nyual pemampul idung enggau mulut ba mua pintu penama ngambika orang mayuh ulih meli enggau ngena tekala nya.

“Kena nyeliahka sida iya (customer) pulai mai jari puang laban nadai ngena pemampul idung enggau mulut.

“Nya alai aku ngarapka bala pemesai ari shopping mall enggau kedai nyual pemampul idung enggau mulut ba mua pintu penama.

“Aku meri buah runding ngagai shopping mall enggau orang ti bisi kedai engkah pemampul idung enggau mulut ba luar enggau jual terus enti nyema bisi beguna tauka deka meli, tang ingat enda tau muru orang ti datai kia taja sida ngena pemampul idung enggau mulut laban nadai ba dalam atur enggau undang-undang,” ku iya madah enggau nyemetak.