Orang gawa ba opis perintah, servis pemadu beguna enda ibuh minta permit ari polis
Cari Berita

Advertisement

Orang gawa ba opis perintah, servis pemadu beguna enda ibuh minta permit ari polis

Admin | beritaiban@gmail.com
May 14, 2020

Datuk Amar Douglas Uggah Embas

Komiti Mutarka Penusah Ngenyit Nengeri Sarawak (JPBNS) udah meri jaku gerah, berindik ari Atur Mindah Besekat Ke Bisi Penetap (PKPB) ti udah berengkah 12 Mei 2020, JPBNS madahka orang ke gawa ba opis perintah enggau servis ti pemadu beguna enda ibuh minta permit ari polis.

Sapit Kepala Menteri Sarawak, Datuk Douglas Uggah Embas madahka, orang mayuh ti deka mindah entara Pelilih menua di Sarawak patut minta permit betulis ari balai polis.

“Ngagai orang ke gawa ba opis perintah enggau servis pemadu beguna ke diau di entara dua pelilih menua, baka Kuching-Samarahan tauka Kuching - Serian tauka Bau-Kuching enggau ke bukai, sida semina patut ngayanka Pas Opis tauka surat pemendar ari bala pemesai (pengaji) kena pulai enggau mansang gawa.

“Kelimpah ari ke disebut aku diatas nya, sida patut minta permit ari polis,” ku iya.

Uggah ti nyadi Chairman Komiti Mutarka Penusah Ngenyit Nengeri Sarawak (JPBNS) madahka, rayat Sarawak ke pulai tauka dari ari menua Semenanjung, Sabah enggau Labuan deka dikuarantin ba rumah.

“Lalu bagi menua Miri, ke lebih agi ba kandang menua ulu baka Bario, Mulu enggau Long Lama ke enda chukup kereban dikena meresa COVID-19 di klinik, sida iya dipinta datai (dikuarantin) ba Palan Kuarantin ngambika ulih diperesa pengerai tauka diambi sampel.

“Enti nyema sampel negatif, baru sida iya dikemendarka pulai ke rumah,” ku iya mansutka jaku tauka pekara nya ba Aum Media COVID-19, kemari.