PKPB: Jam operasyen di Sarawak, agi baka ngelama tu -->
Cari Berita

Advertisement

PKPB: Jam operasyen di Sarawak, agi baka ngelama tu

Admin | beritaiban@gmail.com
May 7, 2020

Sapit Kepala Menteri Sarawak, Datuk Amar Douglas Uggah Embas. (UKAS picha)

KUCHING: Komiti Mutarka Penusah Ngenyit Nengeri (JPBNS) madahka, nadai ubah tauka insur ba sentang maya jam buka (beoperasyen) di Sarawak.

Chairman Komiti Mutarka Penusah Ngenyit Nengeri (JPBNS) Sarawak, Datuk Amar Douglas Uggah Embas madahka, nadai ubah ba sentang jam beoperasyen lebuh Atur Mindah Besekat Nitihka Penetap (PKPB) di Sarawak, kemari.

Ku Uggah ti nyadi Sapit Kepala Menteri Sarawak, pemutus tu digaga dikena kitai nyeliahka rayat Sarawak saru penemu pasal kemaya jam beoperasyen pengudah Atur PKPB dipejalaika di Sarawak.

“Naka diatu, kitai nadai sebarang ubah ba sentang jam operasyen. Aku enggai rayat saru enti nyema jam tu suah diinsur.

“Nya alai kitai netapka jam beoprasyen baka ke udah dipadah ngambika semua rayat di menua tu nemu magang sereta mereti enggau enda saru penemu.

“Jam ti udah ditukuka iya nya, ari jam tujuh (7) pagi nyentukka jan tujuh (7) lemai, ukai ari jam tujuh (7) lemai nyentukka jam tujuh (7) pagi”, ku iya mansutka jaku nya ba Aum Pengarang Berita Ninting Hari COVID-19, kemari.

“Bekaul enggau pengawa pansut ari kandang menua, enda dikemendarka.

“Enti nyema bisi bekaul enggau sebarang penusah ngenyit, sida iya (orang ke ka pansut kandang menua) patut minta enggau ngisi pom pemendar pansut ba balai polis”, ku iya.

“Aku udah dipadahka sentang pengawa pejalai ari nengeri ke nengeri enggau ari pelilih menua ke pelilih menua enda dikemendar, sida iya mesti minta pemendar ari raban polis dulu.

“Kita enda dikemendar bejalai ari Kuching ke Sri Aman enti nadai pemendar ari raba polis”, ku iya.