Rindang main kuluk, 9 lelaki ti gawa perintah ditan polis di Limbang
Cari Berita

Advertisement

Rindang main kuluk, 9 lelaki ti gawa perintah ditan polis di Limbang

Admin | beritaiban@gmail.com
May 26, 2020

Perengka ke mujur dirampas polis ba endur palan suspek main judi.

Lapan lelaki ti nyadi orang gawa perintah enggau siku Ex-Staf perintah mujur ditan polis lebuh benung rindang main kuluk enggau main sekupung ba sebuah ‘depo’ agensi perintah, di Limbang, Hari Enam tu tadi.

Ketuai Polis Pelilih Limbang, Superintendan Abang Zainal Abidin Abang Ahmad madahka, semua orang ke gawa perintah ti bekait enggau kes nya agi gawa ba enam agensi perintah enggau siku Ex-Staf perintah mujur ditan polis ari Opis Tasat Jenayah (JSJ) Opis Polis Pelilih (IPD) Limbang, urung jam 4.25 lemai.

“Lebuh abas ngenyit dipejalaika, raban polis mujur ngerampas mayuh macham perengka ke dikena bejudi enggau duit keretas (cash) RM1,171," ku iya.

Ku iya, semua suspek beumur 27 - 62 taun mujur ngemutarka aktiviti bejudi kelebih agi bekait enggau orang ke gawa perintah.

Zainal mega meri jaku lalau madah barang sapa ti ditemu ngereja penyalah deka ditinggang ukum undang-undang.

“Berebak enggau tu, aku arapka orang mayuh meri penerang bekait aktiviti bejudi ba endur Pelilih Limbang, ngambika ulih nagang aktiviti bejudi enggau ulah ti enda menuku (maksiat) ba pelilih tu," ku iya madah enggau nyemetak.

Kes nya dipansik ari baruh ‘Seksyen 6(1) Akta Rumah Judi Terbuka dan Peraturan 3 Pengawalan Penyakit Berjangkit 2020 kerana melanggar syarat Perintah Kawalan Pergerakan Bersyarat (PKPB) 2020’.