Sarawak ulih ngaga pemutus kediri empu.. -->
Cari Berita

Advertisement

Sarawak ulih ngaga pemutus kediri empu..

Admin | beritaiban@gmail.com
May 1, 2020

ILLUSTRASYEN PICHA: Sapit Kepala Menteri Datuk Amar Douglas Uggah Embas

KUCHING: Sarawak diberi pemendar ngaga pemutus kediri empu bekaul enggau pemutus atur ti dikemendarka ari perintah besai semanjai timpuh Atur Mindah Besekat (PKP) renggat ke-empat, lalu pemutus deka dipadah enda lama agi.

Sapit Kepala Menteri Datuk Amar Douglas Uggah Embas ti mega Chairman Komiti Mutarka Penusah Ngenyit Nengeri Sarawak (JPBNS) madahka, taja pan perintah besai udah ngasuh tauka ngemendarka sekeda pekara tang ba Sarawak ulih ngaga pemutus bepelasarka gaya nengeri kitai tu empu.

Iya madahka nya nyengkaum Prosedur Operasyen Standard (SOP) ngemendarka Taska enggau Tadika beoperasyen maya timpuh PKP, kelimpah ari sektor ekonomi.

"Ba Sarawak kitai udah dilalau YAB Kepala Menteri enggau Menteri Besai sama runding (setuju) enggau pemutus gerah baka ngemendarka industri tauka sektor ekonomi dibuka (beoperasyen) 100 peratus, Sarawak diberi pemendar kediri empu beratika pekara tu.

"Tu mega nyengkaum isu Taska, kelimpah ari isu sektor ekonomi," ku iya ba Aum Pengarang Berita COVID-19 Sarawak ti diatur ba Begunan DUN Lama ditu, kemari.

Ku iya, baka pekara bekaul enggau perintah besai ti udah ngemendarka semina dua iku ke tiap ruang bilik ulih ngena kerita enggau tuju bebelika barang ke diguna ninting hari sereta maya begunaka servis perubat enggau pengerai.

Iya madahka nya mandatori ke dititihka nengeri tu tang belalauka SOP, ku iya.

Ku iya, Sarawak semina deka ngaga pemutus belalauka enggau gaya nengeri tu sereta beratika empas pemutus nya.

"Pemutus bekaul enggau pemendar ke diberi ngagai sektor ekonomi ti dikemendarka beoperayen 100 peratus enggau kapasiti penuh baka ti digerah Opis Menteri Dagang Antarabansa enggau Indusri beberapa hari ke udah, deka dipadahka enda lama agi, nyengkaum isu Taska," ku iya.

Ensanus, Menteri Kanan Nyaga Pengelikun Malaysia, Datuk Seri Ismail Sabri Yaakob madahka, perintah deka berandauka SOP berengkah bejalaika operasyen Taska enggau Tadika semanjai timpuh PKP ke-4.

“SOP deka dikerandauka kemari ba dalam Aum Khas Bala Pemesai tauka Menteri Bekaul Atur PKP,” ku Uggah. #UtusanBorneo