Siku lelaki parai, labuh ari tingkat 15 sebuah apartment di Miri
Cari Berita

Advertisement

Siku lelaki parai, labuh ari tingkat 15 sebuah apartment di Miri

Admin | beritaiban@gmail.com
May 26, 2020

Ketuai Polis Pelilih Miri, ACP Lim Meng Seah.

Siku lelaki parai pengudah dipechayaka labuh ari tingkat 15 sebuah apartment di Taman Bayshore, tumu pagi kemari.

Ketuai Polis Pelilih Miri, ACP Lim Meng Seah madahka, tudah lelaki ke parai nya beumur 19 taun dipelabaka labuh ari apartment nya benung dalam enda nemu diri urung jam 5.30 pagi.

Ku iya, tubuh tudah lelaki nya ditemu ba tingkat dua benung telentang sereta pala sepiak kiba iya dibalut darah.

“Asil peresa ba CCTV, urung jam 2.12 pagi, tudah lelaki ke parai nya bisi ba semak endur lif tingkat 15 kediri benung jayal pejalai lebuh iya nguji ngiga pintu pansut.

“Urung jam 2.16 pagi, tudah lelaki nya duduk ba tisi koridor sereta jayal enggau enda stabil enggau ngujungka labuh ari koridor tingkat 15 apartment nya,” ku Lim madah ba siti penerang kemari, Hari Satu.

Asil pansik ba dalam unit suwa nya, mayuh butul enggau tin ai bisa ba dapur enggau bilik besai.

Tudah lelaki ke parai nya orang ari menua Mesir ti nyadi pelajar ba sebuah institusyen sekula tinggi ditu.

Tudah lelaki nya nyuwa apartment nya enggau 12 iku bakih iya pengelama semalam berengkah ari 24 May.

Tubuh tudah lelaki nya udah dianjung ke Sepital Miri kena bejalaika pengawa buntas tasat.