Siku lelaki parai, siku agi balat bakal, patah kaki kanan -->
Cari Berita

Advertisement

Siku lelaki parai, siku agi balat bakal, patah kaki kanan

Admin | beritaiban@gmail.com
May 18, 2020

KASIH AMAT: Raban bomba benung bejalaika operasyen ba palan eksiden nyadi.

Siku lelaki parai, tang bakih iya diripotka balat bakal pengudah mutosikal ke ditepan seduai iya belantak enggau sebuah kerita di Jalai Bukit Pantar, Roban, tengahari tu tadi.

Nitihka penerang ke dibacha kami ari portal Utusan Borneo, eksiden dipechayaka nyadi urung jam 1 tengah hari tadi, tudah seduai dua benung dirantau jalai ari Roban nuju ke Kabong.

Tudah lelaki ke parai nya dikelala ngena nama, Jackson Lano Avlis, 17 taun, orang ari Ruma Nyambar, Dabai Baruh di Roban, tang bakih iya ke sama serumah panjai enggau iya, 21, diripotka balat bakal enggau patah kaki kanan.

Ketuai Balai Bomba Saratok, Nazry Mohamat madahka, raban iya bisi nerima ripot bekaul enggau eksiden ke nyadi.

Nangkan ke nya, sida iya lalu berumban ngesah ke palan eksiden nyadi.

“Lebuh datai ba palan eksiden nyadi, raban bomba lalu bejalaika pengawa iya nya, ngubat tudah seduai dua nya sebedau seduai iya disua ke ngagai raban paramedik.

“Tang taja pia, raban bomba bisi nerima penerang madahka tudah lelaki ke beumur 17 taun nya, udah ngapuska seput ke penudi lebuh iya diperubatka ba Sepital Saratok," ku iya.

Ku Nazri, tudah lelaki ke beumur 21 taun nya agi diperubatka ba Sepital ke sama, tamg deriba kerita nya nadai nenama tauka nadai bakal.

Naka ke diatu, kes eksiden nya agi dipansik raban polis.