Siku pengajar indu parai, terejun ari kondominium di Kuching -->
Cari Berita

Advertisement

Siku pengajar indu parai, terejun ari kondominium di Kuching

Admin | beritaiban@gmail.com
May 4, 2020

ILLUSTRASYEN PICHA: Orang ti udah parai dibab ngena kain chura burak.

KUCHING: Siku pengajar indu parai pengudah dipechayaka terejun ari tingkat tujuh ba sebuah kondominium di Jalai Alwi, pagi tadi.

Nitihka penerang, pengajar indu nya, beumur 56 taun, ti nyadi pengajar di 'Sekolah Jenis Kebangsaan Chung Hua No 5'.

Ketuai Polis Pelilih Kuching, Asisten Komisioner Awang Din Awang Gani madahka, raban polis bisi nerima ripot ari orang mayuh bekait penusah ti nyadi nya urung jam 7.37 pagi.

Ku Awang Din, lebuh raban polis datai dia, tubuh pengajar ditemu benung tegali ba atas tanah ti semak kondominium nya.

“Asil peresa tumu pemesai Paramedik ari Sepital Besai Sarawak (HUS) madahka, pengajar indu nya udah enda ulih diselamatka agi tauka udah nadai ba palan penusah nyadi.

“Bisi abi telih ba rekung enggau ba gelang jari pengajar indu nya.

“Asil pansik ba palan penusah nyadi, raban polis mujur tetemuka perengka tajam ba dalam bilik mandi ti dipechayaka dikena iya menyati diri empu sebedau iya terejun ari kondominium nya.

Ku Awang Din, pengajar nya diau serumah enggau menyadi indu (kakak) ti tuai dua taun ari iya, 58 taun ba kondominium nya.

“Kakak pengajar indu nya madahka, iya (pengajar indu nya) orang ti rindu nemuai ngagai menua orang kelebih agi maya musim peremisi sekula. Berindik ari nya, pengajar indu nya dipechayaka tusut runding (depressed) ketegal enda tan semina diau di rumah tauka enda ulih mindah kebukai,” ku iya madah ba penerang sehari tu tadi.

Ku iya, asil pansik tumu ba palan penusah nyadi nadai bekau jamah tauka jenayah diripotka ba palan penusah nyadi.

“Tubuh tudah pengajar indu nya dianjung ke Sepital HUS kena bejalaika pengawa silik agi.

“Naka ke diatu, kes ditukuka nyadi Parai Ngenyit (SDR) serayaka nganti ripot pemutus pansik silik.” ku Awang Din.