Taska enggau tadika agi bedau ulih buka di Sarawak -->
Cari Berita

Advertisement

Taska enggau tadika agi bedau ulih buka di Sarawak

Admin | beritaiban@gmail.com
May 12, 2020

ILLUSTRASYEN PICHA: Pelajar Tadika Ria Montessori Miri benung belajar dalam kelas. 

Taska enggau tadika di Sarawak agi bedau ulih buka tauka enda dikemendarka beoperasyen nyentuk ke abis timpuh Atur Mindah Besekat Ke Bisi Penetap (PKPB).

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Sri Hajah Fatimah Abdullah, ngelalau operator taska enggau tadika ngambika enda buka tauka beoprasyen.

“Kitai irau ke sehari tu, sekeda ari apai indai ti nurun gawa sereta sida iya ngasuh taska enggau tadika buka laban deka ninggalka anak sida iya dia maya gawa.

"Aku deka meri jaku lalau sereta madahka, taska enggau tadika agi enda dikemendarka buka,” ku iya, sehari tu tadi.

Ku Fatimah, perintah agi ngaduka Prosedur Operasyen Standard (SOP) bagi institusyen pelajar  anak mit di Sarawak sereta SOP nya nyadi ‘guideline’ ngagai bala pemesai (owner), apai indai enggau staf tadika enggau taska kena ngamatka pengelikun anak mit.

Ku iya, SOP nya udah disuaka ngagai Unit Sektor Ekonomi ngambika ulih diterit sereta dipejalaika.

“Berindik ari nya mega, kitai ulih ngurangka ati bala apai irau ke pasal pengelikun sereta pengerai anak sida iya lebuh maya taska enggau tadika dibuka tauka udah beoperasyen,” ku iya.

“SOP nya mega ulih ngurangka tanggungpengawa operator taska enggau tadika maya atur PKPB agi dipejalaika.

Ku Fatimah, perintah Sarawak udah ngemendarka ulih ngerahka ngena Geran Ninting Taun Khas (GTK) ti udah telah disediaka bagi teetiap institusyen pelajar tumu anak mit ti bisi lisen di Sarawak iya nya penyampau RM5,000.

Ku iya, geran mya udah berengkah 2019 dikena mantu operator taska enggau tadika nyediaka utai empa ti manah (seimbang) bagi anak mit, aktiviti belajar lebih rindang agi, pemansang profesionalisme pelajar sereta orang ti nyaga enggau ngenahka program nyengkaum apai indai.

“Nyadi diatu perintah Sarawak udah meri gerah iya nya, geran GTK ti ulih dikena mantu ngelempungka dua igi pekara iya nya, iya nya ulih bebayarka suwa premis tauka dikena mayar gaji pengajar enggau staf institusyen pelajar tumu anak mit swasta,” ku iya.