Udah ga dik mabuk, meri jaku kamah, ngelaban Atur PKPB.. -->
Cari Berita

Advertisement

Udah ga dik mabuk, meri jaku kamah, ngelaban Atur PKPB..

Admin | beritaiban@gmail.com
May 26, 2020

Ketuai Polis Pelilih Kuching, ACP Awang Din Awang Gani.

Siku lelaki dipechayaka mabuk ditan polis pengudah iya mansutka jaku kamah ngagai orang ke perintah ti benung bejalaika pengawa ngempang jalai alun di Jalai Airport Kuching, tumu pagi tadi.

Ketuai Polis Pelilih Kuching, ACP Awang Din Awang Gani madahka, lelaki nya (suspek) beumur 24 taun, ke dulu agi ari nya lelaki nya ditan laban dipelabaka ngelaban Atur Mindah Besekat Ke Bisi Penetap (PKPB), urung jam 3.15 pagi.

Ku iya, lebuh bejalaika pengawa meresa lelaki nya enda ibuhka utai dipadah tauka enggai meri kerjasama.

“Iya (suspek) dipechayaka mabuk enggau enggai meri kerjasama sereta mansutka jaku kamah enggau nganu bala ke benung gawa maya iya diperesa,” ku iya ba siti penerang, sehari tu tadi.

Lelaki nya mega enda ulih meri kebuah ti menuku lebuh iya ditanya nama kebuah iya bejalai entara pelilih (Kuching-Padawan).

“Berebak enggau nya, iya (suspek) ditan kena bejalaika pengawa nasat silik agi ari baruh ‘Seksyen 186 Kanun Keseksan’ (ngachau orang ke gawa perintah bejalaika pengawa) enggau ‘Seksyen 509 Kanun Keseksaan’ laban meri jaku kamah tauka nya nandaka enda bebasa orang,” ku iya.

Kelimpah ari nya, iya (suspek) mega deka dipansik ari baruh ‘Peraturan-Peraturan Pencegahan Dan Pengawalan Penyakit Berjangkit 2020’.

“Aku ngarapka kitai nitihka atur PKPB enggau arapka orang mayuh enda mai entuka maya mabuk ngambika ulih nyeliahka utai ke dikenangika nyadi,” ku iya madah enggau nyemetak.

TENAKO-NAKO: Enti mabuk tinduk chak..