Enam lelaki ditangkap polis, nyabung manuk di Kuching -->
Cari Berita

Advertisement

Enam lelaki ditangkap polis, nyabung manuk di Kuching

Admin | beritaiban@gmail.com
June 7, 2020

BA ANANG MAYUH ULAH: Raban polis mujur ngerampas enam iku manuk idup, dua iku manuk ti udah parai (bangkai), siti dachin enggau siti taji manuk.

Siku anembiak enggau siku orang tuai, antara enam lelaki ditangkap polis ketegal nyabung manuk maya Atur Mindah Besekat Ke Bisi Penetap (PKPB) ba kebun di Jalai Fairy Cave, Bau, pagi Hari Enam.

Ketuai Polis Pelilih Bau, DSP Poge Nyaon madahka, anembiak nya beumur 16 taun, enggau orang tuai nya beumur 73 taun, sereta empat iku agi lelaki beumur antara 38 nyentuk 58 taun nya ditangkap polis lebuh seraban polis ari Opis Tasat Jenayah Pelilih (IPD) Bau bejalaika abas ngenyit ‘OP Dadu’

“Lebuh OP Dadu urung  jam 11 pagi ba tanah puang dalam kebun di Jalai Fairy Cave, Bau, enam lelaki peranak menua ditangkap ketegal bekait enggau pengawa nyabung manuk,” ku madah ba dalam penerang.

Ku Poge, sida iya sebuat ditan ari baruh ‘Seksyen 3(1) Langkah-Langkah Pencegahan Penganiayaan Terhadap Binatang 1962 dan Peraturan 3 Peraturan-peraturan pencegahan’ enggau ‘Pengawalan Penyakit Berjangkit 2020 (Langkah-langkah dan di dalam kawasan tempat jangkitan)(No.6)2020’.

“Polis mega ngerampas enam iku manuk idup, dua iku manuk ti udah parai (bangkai), siti dachin enggau siti taji manuk.

Kelimpah ari nya, Poge madahka, semua sida ke kena tangkap nya (suspek) nadai ngembuan rikod penyalah tauka jenayah sebedau tu.

“Sida iya enam (suspek) ditan ari baruh ‘Seksyen 3(1) Langkah-Langkah Pencegahan Penganiayaan Terhadap Binatang 1962’, sida iya ulih kena ukum kompaun RM1,000 tauka tiga bulan jil enti ditukuka salah,” ku iya.

“Tang ba penyalah ngelaban Atur PKPB, sida iya ulih dikompaun enda ngelui ari RM1,000 tauka dijil enda ngelui enam bulan tauka dua iti nya sekali enti ditukuka salah.