Siku lelaki parai, kena pantap ba pala di Kuching -->
Cari Berita

Advertisement

Siku lelaki parai, kena pantap ba pala di Kuching

Admin | beritaiban@gmail.com
June 5, 2020

Bangkai tudah Alias pengudah belibat enggau orang ke ngempu kebun.

Siku lelaki ditemu parai ba kebun di Jalai Landeh, Kota Padawan ditu, pengudah dipechayaka nyerang orang ke ngempu kebun, kena lemai Tiga tu tadi.

Ketuai Polis Pelilih Padawan, Superintenden Aidil Bolhassan asil pansik raban polis bangkai lelaki nya ditemu kena Hari Empat pengudah bini orang ke ngempu kebun nya ngaga ripot polis.

Ku iya, tudah lelaki ke parai nya dikelala ngena nama Mohd Alias Abdullah, 57 taun, orang ari Kampung Tabuan Lot, Jalai Sungai Apong.

“Orang ke ngempu kebun madahka lelaki ke parai nya nyerang iya ngena duku lalu ngujungka seduai iya belibat sebedau iya mantap pala lelaki ke parai nya ngena duku ti dirampas iya ari lelaki ke parai nya.

“Pengudah nya, orang ke ngempu kebun nya lari nyelamat kediri.

“Lebuh orang ke ngempu kebun datai ba rumah ti enda jauh ari palan penusah nyadi, orang ke ngempu kebun nya lalu madahka penusah ke nyadi ngagai bini iya. Nangkan ke nya, bisi orang ke ngempu kebun nya lalu minta bantu ari orang ke berimbai rumah ngambika ulih nganjung laki iya (orang ke ngempu kebun) ke Sepital Besai Kuching (HUS)," ku iya lebuh dirandau pengarang berita, sehari tu tadi.

Ku iya, orang ke ngempu kebun nya beumur 54 taun, bisi bakal ba pala enggau berang kiba iya pengudah kena pantap.

“Asil pansik ba palan penusah nyadi mega, raban polis mujuk tetemuka keresa ke diempu tudah lelaki ke parai iya nya, selapuk mutosikal (helmet), guntin, talipaun binching, selipar, kantung sandik enggau gelang jari emas ke diempu orang ke ngempu kebun nya,” ku iya.

“Tubuh tudah lelaki ke parai nya udah dianjung ke Unit Forensik HUS kena bejalaika pengawa silik agi.

“Pengawa nyidi tauka ngelala lelaki ke parai nya deka dipejalaika bala ke nyaga tauka sebilik enggau iya, sehari tu,” ku Aidil.

Pansik silik agi dipejalaika enggau orang ke ngempu kebun nya mega ditan polis kena mantu pengawa mansik ari baruh ‘Seksyen 324’ enggau ‘302 Kanun keseksaan’ ketegal munuh lelaki ke parai nya.

“Lebuh ke ditanya tasat, orang ke ngempu kebun agi bedau ulih nyaut enggau engkeman lebuh iya ditanya nama kebuah penusah nyadi,” ku iya. #UtusanBorneo